+0 به يه ن

یام نیوزون صاباح قازئتیندن  آلدیغی خبره گؤره آنکارانین بئرگیز عمرانی  شیرکتی تبریز مئترو سونون 3 –خطی و  تبریز-بازرگان آنا یولو(آوتوبان) داخیل اولماقلا 1،8 میلیارد دوللار دیَرینده ایکی بؤیوک پروژه  حیاتا کئچیرمک اوچون شرقی آذربایجان استانی نین مسئوللاری ایله قرارداد  ایمضالاییب.

بئرگیز شیرکتی‌ دوزلدن  مئترو خطی تبریز طییاره مئیدانیندان  باشلایاراق شهر مرکزینی کئچیب گونئی آنا یولو کسایی نین قیراغیندا یئرلشن اوتوبوس ترمینالینا  باغلاناجاق. شیرکت پروژه نی  2017-جی ایلده بیتیره‌جه‌یینی بیلدیریب.

ایرانین تسنیم  خبرلیگی  تبریز مئترو خطتی‌نین 850 میلیون دوللارلیق بیر پروژه  اولدوغونو یازیب.

تبریز و قربی آذربایجان استانلاری نین بازرگان شهری آراسیندا حیاتا کئچیریله‌جک آنا یول (اوتوبان) پروژه سی اوچون تورکییه و ایران طرفی اورتاق بیر شیرکت قوروبلار. بازرگان عمرانی  یئنی قورولان شیرکتین یوزه  65  ایران یول ناظرلیگی نین  یوزه 35 تورکییه لی بئرگیز شیرکتی نین دیر.

دیت (دوزت –ایشلت- تحویل وئر) مودئلی ایله حیاتا کئچیریله‌جک 225 کیلومئترلیک یول پروژه ‌سی‌نین دیَری 1 میلیارد دوللاردیر.