+0 به يه ن

 یام نیوز:آذربایجان خاریجی ایشلر ناظری ائلمار محمدیاروو ایله مطبوعات کنفرانسیندا دانیشان ظریف، نقلیات، ترانزیت، تاریم و باشقا ساحه‌لرده ده امکداش‌لیغی گلیشدیرمک ایسته‌دیک‌لرینی سؤیله‌دی و "ایکی‌لی امکداشلیغین یانیندا تورکیه ایله بیرلیکده اوچلو بیر امکداش‌لیق فورماتیمیز وار. بو امکداش‌لیغی روسیا ایله بیرلیکده دؤردلو فورماتا دا چئکه‌بیلریک" دئدی .
ظریف، آذربایجان-‌ارمنیستان چاتیشماسینا و داغ‌لیق قاراباغ پروبلئمینه ده توخونا‌راق، بون‌لاری سؤیله‌دی:
"ایران، بو چاتیشما بؤلگه‌سی ایله سرحد. بیز بؤلگه‌ده ثابت‌لیک ایسته‌ییریک. بوتون قونشولاریمیز بیزیم اوچون اؤنم‌لی. آذربایجان ایسه ان اؤنم‌لی قونشولاریمیزدان بیری. بو اؤلکه‌ده چاتیشما اولماسی بیزی راحاتسیز ائدیر. سورونون اولوسلارآراسی حقوق قورال‌لاری و آذربایجانین تورپاق بوتؤو‌لوگو چرچیوه‌سینده، باریش یولو ایله حل ائدیلمه‌سینی ایسته‌ییریک. چاتیشمانین باشلادیغی ایللرده آذربایجانا یاردیم‌لار ائتمیشدیک. ایندی ده پروبلئمین حلی اوچون بیزه ده رول دوشسه قونشو اؤلکه اولا‌راق کؤمکچی اولماغا حاضیریق. "
آذربایجان خاریجی ایشلر باخانی ائلمار محمدیاروو دا ایران‌لا هم ایکی‌لی، هم ده تورکیه ایله بیرلیکده اوچلو امکداش‌لیغی داوام ائتدیردیک‌لرینی، بیر سونراکی آذربایجان-تورکیه-ایران خاریجی ایشلر باخانلاری گؤروشونون یاخین دؤنمده ایراندا ائدیله‌جیینی ایفاده ائتدی.
محمدیاروو، داغ‌لیق قاراباغ پروبلئمی‌نین حلینه باغلی آپاریلان مذاکیره پروسه‌سی باره‌سینده بونلاری سؤیله‌دی:
"مینسک قروپو ائش باشقانلاری تئز تئز آتیشکس پوزونتولاریندان‌ راحاتسیز اولدوق‌لاری یولودا بیانات یاییملیر. بئله بیانات‌لار یئرینه ارمنیستان‌دان عسگرلرینی گئری چئکمه‌سی طلب ائدیلمه‌لی‌دیر. ارمنی عسگرلرینین آذربایجان تورپاغیندا نه ایشی وار؟ اونلار گئری چئکیلسه آیشکس پوزونتوسو قونوسو دا گوندمده اولمایا‌جاق. چونکو او زامان آتیشکسه ده گرک قالمایا‌جاق و بیز بلریشی ساغلایاجاییق‌"